Skráning á NHO24 hafin!

Lýsing

Á síðastliðnum 10 árum hefur íbúum á Íslandi undir 70 ára fjölgað um 14% á sama tíma og íbúum 70 ára og eldri hefur fjölgað um 28%. Sú þróun skapar mikið álag á heilbrigðis- og félagsþjónustu fyrir aldraða og skortur er á samhæfingu þjónustunnar milli ríkis og sveitarfélaga gagnvart sjúklingum. 

Afleiðingin er að aldraðir sjúklingar eru oft fluttir á bráðamóttöku með sjúkraflutningum frekar en að veitt sé viðeigandi þjónustu með t.d. heimahjúkrun eða fjarvitjunum. 

Draumsýn

Með samstilltu átaki viðkomandi stjórnsýslustiga á Suðurlandi er markmiðið að opna heimaspítala í þróunarsamstarfi sem samþættir heilbrigðisþjónustu og félagsþjónustu fyrir aldraða. 

Þróunarverkefnið felur í sér fjarvöktun og fjarheilbrigðisþjónustu, bráðavitjunarteymi og samhæfingu samskipta og þjónustu sveitafélagsins og ríkisins.

Til að ná settu marki er þörf á nýsköpun í opinberri stjórnsýslu sem samhæfir samskiptaleiðir og þjónustu heimaspítalans og gerir hana aðgengilega og notendavæna fyrir aldraða. 

Afrakstur verkefnisins má svo heimfæra fyrir alla landshluta svo þjónusta heimaspítala geti náð til allra landshluta. 

Ert þú með lausn á þessari áskorun?

Bókaðu nýsköpunarmót með Heilbrigðisstofnun Suðurlands hér

Lýsing

Hjá Hafnarfjarðarkaupstað eru um 1.500 - 1.700 starfsmannakort úr plasti í umferð hverju sinni. Kortin eru t.a.m. notuð við innstimplun í stimpilklukku, veita aðgengi að prenturum og vinnustaðnum, veita afslætti fyrir starfsfólk á ýmsum stöðum og eru notuð við greiðslu fyrir máltíðir.

Umsýsla og rekstur starfsmannakorta er kostnaðarsamur og tímafrekur, plastkortum fylgir öryggisáhætta þegar þau týnast, kortin ásamt fylgihlutum þeirra eru óumhverfisvæn og gjarnan gleymist að skila þeim.

Draumastaða

Með stafvæðingu starfsmannakorta í farsíma er ætlunin að auka þægindi og bæta notendaupplifun starfsfólks í daglegum athöfnum og auðvelda viðbætur og tengingar við fríðindi fyrir starfsfólk. Stafræn starfmannakort eru einnig umhverfisvænni og lágmarka áhættu sem fylgir týndum kortum ásamt því að með stafvæðingu má auka skilvirkni og hagkvæmni við umsýslu og rekstur kortanna.

Ávinningur verkefnisins felst einnig í samlegðaráhrifum fyrir fleiri stofnanir sem vilja taka upp stafræn starfsmannakort.

Ert þú með lausn á þessari áskorun?

Bókaðu nýsköpunarmót með Hafnarfjarðarbæ hér

Lýsing

Hjá hinu opinbera starfa um 50.000 einstaklingar á fjölbreyttum vinnustöðum um land allt. Opinbert starfsfólk hefur ekki alltaf aðgang að mötuneytum, fjarvinna er orðin algeng og starfsfólk er oft á ferðinni eða starfar almennt utan vinnustaðarins sem þýðir að stór hópur starfsfólks þarf að kaupa sér mat á vinnutíma. Í mörgum tilfellum prentar starfsfólk út matarbeiðnir til að sýna á veitingastöðum sem yfirmaður þarf að kvitta á. Þetta kallar á pappír og töluverða vinnu hjá bókara.

Þegar ekki er hægt að bjóða starfsfólki upp á mötuneyti niðurgreiðir ríkissjóður fæðiskostnað með matarpeningum. Matarpeningar nýtast hins vegar ekki til beinna innkaupa, heldur eru þeir skattlagðir með launum og starfsfólk leggur út fyrir kostnaði þar sem það velur að versla veitingar.

Draumastaða

Markmið þessarar áskorunar er að bjóða opinberu starfsfólki að nýta niðurgreiðslu ríkissjóðs á fæðiskostnaði þegar það greiða fyrir veitingar þar sem því hentar hverju sinni.

Með slíkri lausn er ætlunin að einfalda og hámarka nýtingu matarpeninga fyrir starfsfólk, lágmarka umsýslu þeim tengdum og bæta aðgengi fólks að máltíðum á vinnutíma óháð staðsetningu. Á sama tíma geta fleiri veitingaaðilar þjónustað opinbert starfsfólk án þess að halda sérstaklega utanum uppgjör við opinbera vinnustaði.

Ert þú með lausn á þessari áskorun?

Bókaðu nýsköpunarmót með Ríkiskaupum hér